கொழும்பு: சர்வதேச மேசைப்பந்து தரவரிசையில் 11 வயதுக்குட்பட்ட ஆண்களுக்கான பிரிவில் இலங்கையின் இளம் வீரர் டாவி சமரவீர (Dawiee Samaraweera) முதலிடத்தைப் பிடித்து உலகையே வியக்க வைத்துள்ளார். இதன் மூலம், எந்தவொரு வயதுப் பிரிவிலும் சர்வதேச தரவரிசையில் முதலிடத்தைப் பிடித்த முதல் இலங்கை மேசைப்பந்து வீரர் என்ற வரலாற்றுப் பெருமையை அவர் பெற்றுள்ளார்.
இளையோர் உலக மேசைப்பந்து போட்டியில் தங்கம்
சமீபத்தில் இத்தாலியில் நடைபெற்ற உலக மேசைப்பந்து இளையோர் போட்டித்தொடரில் (WTT Youth Contender) வெளிப்படுத்திய அபாரமான திறமையே டாவியின் இந்த முன்னேற்றத்திற்குக் காரணமாக அமைந்தது. 11 வயதுக்குட்பட்டோருக்கான பிரிவில் மிகச்சிறந்த ஆட்டத்தை வெளிப்படுத்திய அவர், அங்கு தங்கப் பதக்கத்தை வென்று சம்பியன் பட்டம் சூடினார். சர்வதேச இளையோர் மேசைப்பந்து தொடர் ஒன்றில் இலங்கை வீரர் ஒருவர் சம்பியன் பட்டம் வென்ற முதல் சந்தர்ப்பம் இதுவாகும்.
தரவரிசையில் அசுர வளர்ச்சி
தற்போது 10 வயதே நிரம்பிய டாவி, தன்னை விட அதிக வயதுடைய வீரர்களுக்கு எதிராகப் போட்டியிட்டுப் பெற்ற வெற்றிகளின் மூலம், 13 வயதுக்குட்பட்டோருக்கான உலகத் தரவரிசையில் 11 ஆவது இடத்தைப் பிடித்துள்ளார். இவரது இந்த வேகமான வளர்ச்சி, உலக மேசைப்பந்து அரங்கில் அதிக நம்பிக்கையளிக்கக்கூடிய இளம் வீரர்களில் ஒருவராக இவரை அடையாளப்படுத்தியுள்ளது.
புனித தோமஸ் கல்லூரியின் பெருமை
கல்கிசை புனித தோமஸ் கல்லூரியின் (S. Thomas’ College, Mt. Lavinia) மாணவனான டாவி சமரவீர, அவரது அபார விளையாட்டுத் திறமைக்காக அண்மையில் கல்லூரியின் சிறந்த விளையாட்டு வீரருக்கான விருதையும் வென்றிருந்தார் என்பது குறிப்பிடத்தக்கது.
இலங்கை விளையாட்டுத் துறைக்கு சர்வதேச மட்டத்தில் பெரும் கௌரவத்தைத் தேடித்தந்துள்ள டாவியின் இந்தச் சாதனைக்கு நாடெங்கிலும் இருந்து பாராட்டுக்கள் குவிந்து வருகின்றன.
