கல்வி மறுசீரமைப்பு நடவடிக்கைகளை முன்னெடுத்தல்

இலங்கையின் கல்வித்துறையில் நடைமுறைப்படுத்தப்பட்டு வரும் புதிய கல்வி மறுசீரமைப்புச் செயன்முறையின் கீழ், 6ஆம் தரத்திற்கான மறுசீரமைப்புப் பணிகளை 2027ஆம் ஆண்டு ஆரம்பிக்கத் தயாராக உள்ளதாக கல்வி மறுசீரமைப்பு தொடர்பான பாராளுமன்ற உபகுழுவில் வலியுறுத்தப்பட்டது.

கல்வி மறுசீரமைப்பு தொடர்பான பாராளுமன்ற உபகுழு, பிரதமர் கலாநிதி ஹரிணி அமரசூரியவின் தலைமையில் நேற்று (17) பாராளுமன்றத்தில் கூடியது. இதன்போது, புதிய கல்வி மறுசீரமைப்பின் தற்போதைய முன்னேற்றம் மற்றும் எதிர்காலத் திட்டங்கள் குறித்து விரிவாகக் கலந்துரையாடப்பட்டது.

முதலாம் தர மறுசீரமைப்பின் தற்போதைய நிலை

இங்கு கருத்துத் தெரிவித்த கல்வி அமைச்சின் செயலாளர் நாலக கலுவெவ, 2026ஆம் ஆண்டு ஆரம்பிக்கப்பட்ட முதலாம் தரத்திற்கான புதிய கல்வி மறுசீரமைப்புச் செயன்முறையின் முன்னேற்றங்கள் இனிவரும் காலங்களில் முறையாகக் கண்காணிக்கப்படும் எனத் தெரிவித்தார். மேலும்:

• முதலாம் தரத்தின் இரண்டாம் மற்றும் மூன்றாம் தவணைகளுக்கான செயற்பாட்டு நூல்கள் (Activity Books) அச்சிடுவதற்குத் தயார் செய்யப்பட்டுள்ளன.
• இரண்டாம் தவணைக்கான செய்முறைச் செயற்பாட்டு நூல்களை ஏப்ரல் பாடசாலை விடுமுறையின் பின்னர் மாணவர்களுக்கு வழங்கத் திட்டமிடப்பட்டுள்ளது.

6ஆம் தரத்திற்கான முன்னேற்பாடுகள்

6ஆம் தரத்திற்குரிய அனைத்துப் பாட அலகுகளும் (Modules) விசேட குழுக்கள் ஊடாக ஆழமாக மீளாய்வு செய்யப்பட்டு வருகின்றன. அத்துடன், புதிய கல்வி மறுசீரமைப்பின் கீழ் ஆசிரியர்கள் மற்றும் பயிற்சியாளர்களுக்கான பயிற்சிகள் தற்போது முன்னெடுக்கப்பட்டு வருவதாக அதிகாரிகள் சுட்டிக்காட்டினர்.

சர்வதேச ஒத்துழைப்பு மற்றும் தேசிய வழிநடத்தல் குழு

மதிப்பீடுகள் மற்றும் பெறுபேறு கணிப்பீடுகள் தொடர்பான பரிந்துரைகளைப் பெற்றுக்கொள்வதற்காக சர்வதேச வளவாளர்களின் பங்களிப்புடன் விசேட குழுவொன்று நியமிக்கப்பட்டுள்ளது. அந்த நிபுணர்கள் விரைவில் இலங்கைக்கு வருகை தரவுள்ளனர்.

மேலும், ஜனாதிபதியின் ஆலோசனைக்கு அமைய ‘தேசிய வழிநடத்தல் குழுவை’ (National Steering Committee) நியமிப்பதற்கான அமைச்சரவைப் பத்திரம் சமர்ப்பிக்கப்பட்டுள்ளதுடன், மாவட்ட மற்றும் பிரதேச மட்டத்திலான வழிநடத்தல் குழுக்களையும் எதிர்காலத்தில் நியமிக்க நடவடிக்கை எடுக்கப்படவுள்ளது.

இக்கலந்துரையாடலில் ஆளும் மற்றும் எதிர்க்கட்சிகளின் பாராளுமன்ற உறுப்பினர்கள், கல்வி, உயர்கல்வி மற்றும் தொழிற்கல்வி அமைச்சின் உயர் அதிகாரிகள் உள்ளிட்டோர் கலந்துகொண்டன