2026 இல் பாடசாலைகளை ஆரம்பித்தல் மற்றும் கல்வி மறு�

இலங்கை கல்வி அமைச்சினால் 2026 ஆம் ஆண்டிற்கான பாடசாலை நேர அட்டவணை, தவணைப் பரீட்சைகள் மற்றும் கல்விசார் ஊழியர்களின் கடமைகள் தொடர்பான புதிய அறிவுறுத்தல் கோவை (2026.01.02 திகதியிடப்பட்ட ED/17/03/01/01/01 கடிதம்) வெளியிடப்பட்டுள்ளது. அண்மையில் ஏற்பட்ட இயற்கை அனர்த்தங்கள் மற்றும் புதிய கல்வி மறுசீரமைப்புகளைக் கருத்திற்கொண்டு மேற்கொள்ளப்பட்டுள்ள இத்தீர்மானங்களின் முழுமையான தொகுப்பு வருமாறு:

1. பாடசாலை நேரம்: 2.00 மணித் தீர்மானம் இரத்து
முன்னர் திட்டமிடப்பட்டவாறு 2026 ஆம் ஆண்டு முதல் பாடசாலைகளைப் பிற்பகல் 2.00 மணி வரை நடாத்தும் தீர்மானம் கைவிடப்பட்டுள்ளது. அண்மையில் ஏற்பட்ட இயற்கை அனர்த்தங்களால் பாடசாலைக் கட்டமைப்புகள் மற்றும் போக்குவரத்துத் துறையில் ஏற்பட்ட பாதிப்புகளைக் கருத்திற்கொண்டு, மாணவர்களின் நலன் கருதி இத்தீர்மானம் பிற்போடப்பட்டுள்ளது.
இதற்கமைய, 2026 ஆம் ஆண்டில் பாடசாலைகள் வழமை போன்று காலை 7.30 மணி முதல் பிற்பகல் 1.30 மணி வரை நடைபெறும்.

2. பாடசாலை ஆரம்பமாகும் திகதிகள்
பல்வேறு தரங்களுக்கான பாடசாலைத் தவணைகள் ஆரம்பமாகும் திகதிகள் பின்வருமாறு:

தரம் 1 மற்றும் தரம் 6 தவிர்ந்த ஏனைய வகுப்புக்கள் (தரம் 2-5 மற்றும் 7-13): 2026 ஜனவரி 05 ஆம் திகதி ஆரம்பமாகும்.
தரம் 6: 2026 ஜனவரி 21 ஆம் திகதி முதல் கற்றல் செயற்பாடுகள் ஆரம்பமாகும் (எனினும், புதிய மாணவர் அனுமதி தொடர்பான நிர்வாக நடவடிக்கைகள் ஜனவரி 05 இல் ஆரம்பிக்கலாம்).
தரம் 1: மாணவர்களை இனங்காணும் செயற்பாடுகள் ஜனவரி 05 இல் ஆரம்பிக்கப்படுவதுடன், உத்தியோகபூர்வ கற்றல் ஜனவரி 29 இல் ஆரம்பமாகும்.

3. முதலாம் தவணைப் பரீட்சை இரத்து (தரம் 7-11)
மிக முக்கிய மாற்றமாக, பழைய பாடத்திட்டம் நடைமுறையிலுள்ள தரம் 7 முதல் 11 வரையான வகுப்புக்களுக்கு 2026 ஆம் ஆண்டின் முதலாம் தவணைப் பரீட்சை நடாத்தப்பட மாட்டாது.
புதிய கல்வி மறுசீரமைப்புச் செயன்முறையை நடைமுறைப்படுத்தும்போது ஏற்படும் நேரக் குறைபாட்டை நிவர்த்தி செய்வதற்கும், பாடத்திட்டங்கள் மற்றும் மொடியூல்களைப் பூர்த்தி செய்வதற்கும் இந்த நேரம் முழுமையாக கற்றல் செயற்பாடுகளுக்காகப் (Teaching-Learning Process) பயன்படுத்தப்பட வேண்டும் என அறிவுறுத்தப்பட்டுள்ளது.

4. பாடவேளை மற்றும் கலைத்திட்ட மாற்றங்கள்
தரம் 5: பாடசாலை நேரம் காலை 7.30 – பிற்பகல் 1.30 வரை. வாரத்திற்கு 30 மணித்தியாலங்கள் ஒதுக்கப்படும்.
தரம் 6 – புதிய மறுசீரமைப்பு:
நாளாந்தம் 7 பாடவேளைகள் (ஒரு பாடவேளை 45 நிமிடங்கள்).
அழகியல் பாடத் தொகுதியிலிருந்து ‘இலக்கிய நயம்’ (சிங்களம்/ தமிழ்/ ஆங்கிலம்/ அரபு) நீக்கப்பட்டுள்ளது.
மேலதிக கற்றல் மொடியூல்கள்: முதலாம் தவணையில் தாய்மொழி (இலக்கிய நயம்) மற்றும் ஆங்கிலம் (Into the Wild) ஆகிய பாடங்களுக்கான மேலதிக மொடியூல்கள் அறிமுகப்படுத்தப்படுகின்றன.
தரம் 7-9 (பழைய கலைத்திட்டம்): இதிலும் அழகியல் பாடங்களின் கீழ் வரும் ‘இலக்கிய நயம்’ இத்தரங்களுக்குப் பொருந்தாது எனத் திருத்தப்பட்டுள்ளது.

5. முஸ்லிம் பாடசாலைகளுக்கான விசேட நேர அட்டவணை
முஸ்லிம் பாடசாலைகளில் பின்பற்றப்பட வேண்டிய நேர அட்டவணை:
திங்கட்கிழமை: காலை 7.30 – பி.ப. 1.30 வரை (7 பாடவேளைகள்).
செவ்வாய் முதல் வியாழன் வரை: காலை 7.30 – பி.ப. 2.15 வரை (8 பாடவேளைகள்).
வெள்ளிக்கிழமை: காலை 7.30 – மு.ப. 11.15 வரை (4 பாடவேளைகள்).

6. ஆசிரியர் பணிச்சுமை (Teachers’ Workload)
புதிய மறுசீரமைப்புகளை முன்னிட்டு ஆசிரியர்களின் கற்பித்தல் பாடவேளைகளில் திருத்தங்கள் செய்யப்பட்டுள்ளன:
ஆசிரியர்கள்: வாரத்திற்கு 35 பாடவேளைகளில், குறைந்தபட்சம் 28 பாடவேளைகள் கற்பித்தலில் ஈடுபட வேண்டும்.
மேற்பார்வை ஆசிரியர்கள்: வாரத்திற்கு குறைந்தபட்சம் 14 பாடவேளைகள்.
உதவி அதிபர்கள்: வாரத்திற்கு குறைந்தபட்சம் 10 பாடவேளைகள்.
பிரதி அதிபர்கள்: வாரத்திற்கு குறைந்தபட்சம் 08 பாடவேளைகள்.
2026 ஆம் ஆண்டில் பாடசாலை நேரத்தை அதிகரிக்காவிட்டாலும், தவணைப் பரீட்சையை இரத்துச் செய்தல் மற்றும் ஆசிரியர்களின் கற்பித்தல் நேரத்தை முறைப்படுத்துதல் ஊடாகக் கற்றல்-கற்பித்தல் செயற்பாடுகளுக்கு அதிக முன்னுரிமை வழங்கப்பட்டுள்ளமை இவ்வறிறுத்தல்கள் மூலம் தெளிவாகின்றது.

PDF files