இலங்கை கல்விச் சபையை நிறுவுவதற்குப் பொதுமக்கள�

பத்தரமுல்ல – இலங்கையின் கல்விச் சேவைகளின் தரத்தை மேம்படுத்துவதற்காக, கௌரவப் பிரதமர் மற்றும் கல்வி, உயர்கல்வி மற்றும் தொழிற்கல்வி அமைச்சரின் பரிந்துரையின் பேரில் ‘இலங்கை கல்விச் சபை’ (SLEC) எனும் புதிய நிறுவனத்தை நிறுவுவதற்கு முன்மொழியப்பட்டுள்ளது. கல்விச் சேவைகளின் தரத்தை உயர்த்துவது தொடர்பான நிபுணர் குழுவின் அறிக்கையின் பரிந்துரைகளுக்கமைய இந்த நடவடிக்கை எடுக்கப்பட்டுள்ளது.

முன்மொழியப்பட்டுள்ள சபையின் நோக்கங்கள்

இந்தக் கல்விச் சபை நான்கு முக்கிய துறைகளை உள்ளடக்கியதாக அமையும்: விதிகள், தர உத்தரவாதம், நிறுவனங்கள் மற்றும் பாடநெறிகளுக்கான அங்கீகாரம், மற்றும் கல்வித் துறைசார் நிபுணர்களுக்கான உரிமம் வழங்குதல். இதன் முக்கிய நோக்கங்களாவன:

நிபுணத்துவ மேம்பாடு: முன்பள்ளி முதல் இரண்டாம் நிலை வரை அனைத்து மட்டங்களிலும் உள்ள கல்விசார் நிபுணர்களைப் பதிவு செய்தல் மற்றும் ஒழுங்குபடுத்தல்.
தர உத்தரவாதம்: கல்வி நிறுவனங்கள் மற்றும் பாடநெறிகளுக்கான தர உத்தரவாதம் மற்றும் அங்கீகாரத்தை உறுதிப்படுத்துதல்.
இருமொழி கல்வி: அனைத்து மாணவர்களுக்கும் இருமொழி கல்வி வாய்ப்புகளை வழங்குவதற்காக உயர்தர இருமொழி கல்வியாளர்களை உருவாக்குதல்.
நிபுணர்களின் நலன்புரி: கல்விசார் நிபுணர்களின் சம்பள விவகாரங்கள், நலன்புரி மற்றும் அவர்களுக்கும் அரசாங்கத்திற்கும் இடையிலான பிரச்சினைகளைத் தீர்க்கும் மத்தியஸ்தராகச் செயற்படுதல்.
ஒழுக்கக்கோவை: ஆசிரியர்களுக்கான குறைந்தபட்ச தகுதிகளைத் தீர்மானித்தல் மற்றும் அவர்களுக்கான தொழில்சார் ஒழுக்கக்கோவையைப் பேணுதல்.

பொதுமக்களின் கருத்துக்களை சமர்ப்பித்தல்

நாடாளுமன்ற ஆலோசனைக் குழுவின் தீர்மானத்திற்கமைய, இந்த புதிய கல்விச் சபையை நிறுவுவது தொடர்பான பொதுமக்களின் கருத்துக்களும் ஆலோசனைகளும் தற்போது கோரப்பட்டுள்ளன.

தங்களது கருத்துக்களை 2026.05.10 ஆம் திகதி அல்லது அதற்கு முன்னர் கீழ்க்கண்ட முகவரிக்கு தபால் மூலமாகவோ அல்லது மின்னஞ்சல் மூலமாகவோ அனுப்பி வைக்க முடியும்:

மின்னஞ்சல்: teacherest@moe.gov.lk
தொலைநகல்: 011 2784819
தபால் முகவரி: மேலதிக செயலாளர் (நிறுவனங்கள்), கல்வி, உயர்கல்வி மற்றும் தொழிற்கல்வி அமைச்சு, “இசுருபாய”, பெலவத்த, பத்தரமுல்ல.

இந்தத் திட்டமானது இலங்கையின் கல்வித் துறையில் சர்வதேச தரத்திலான நிபுணர்களை உருவாக்குவதையும், அனைத்துப் பிரஜைகளுக்கும் சமமான மற்றும் தரமான கல்வியை உறுதிப்படுத்துவதையும் நோக்கமாகக் கொண்டுள்ளது