2025ஆம் ஆண்டு கல்விப் பொதுத் தராதர உயர்தரப் பரீட்சையில் மிகச்சிறந்த பெறுபேறுகளைப் பெற்ற மாணவர்களுக்கு, உலகின் முன்னணி தரவரிசையில் உள்ள பல்கலைக்கழகங்களில் உயர்கல்வியைத் தொடர்வதற்கான அரசாங்க புலமைப்பரிசில் திட்டத்தை கல்வி, உயர்கல்வி மற்றும் தொழிற்கல்வி அமைச்சு அறிவித்துள்ளது.
அரசாங்கத்தின் ‘வளமான நாடு – அழகான வாழ்க்கை’ கொள்கைத்திட்டத்திற்கு அமைவாக இந்த விசேட வெளிநாட்டு புலமைப்பரிசில் திட்டம் நடைமுறைப்படுத்தப்படுகிறது. இத்திட்டத்தின் மூலம் 200 மிகச்சிறந்த மாணவர்களை வலுவூட்டும் நோக்கில், சர்வதேச ரீதியில் அங்கீகரிக்கப்பட்ட உயர்தர வெளிநாட்டுப் பல்கலைக்கழகங்களில் முதற்பட்டப்படிப்பைப் பயில்வதற்கான வாய்ப்பு வழங்கப்படுகிறது. இது தொடர்ந்து இரண்டாவது ஆண்டாகவும் இம்முறை முன்னெடுக்கப்படுகின்றமை குறிப்பிடத்தக்கது.
திட்டத்தின் முக்கிய விபரங்கள்:
- 2026/2027 கல்வியாண்டு: இக்காலப்பகுதிக்காக சுமார் 25 முதல் 50 மாணவர்களுக்கு அரசாங்கத்தினால் முழுமையாக நிதியளிக்கப்படும் புலமைப்பரிசில் வாய்ப்புகள் வழங்கப்படும்.
- நீண்டகால இலக்கு: 2025 முதல் 2029 வரையான ஐந்து ஆண்டுகளில் மொத்தம் 200 புலமைப்பரிசில்களை வழங்குவதே அரசாங்கத்தின் இலக்காகும்.
- அதிகரிப்பு: ஆண்டுதோறும் தெரிவு செய்யப்படும் மாணவர்களின் எண்ணிக்கை படிப்படியாக அதிகரிக்கப்படும் என அமைச்சு விடுத்துள்ள அறிக்கையில் தெரிவிக்கப்பட்டுள்ளது.
திறமையான மாணவர்களுக்கு சர்வதேச மட்டத்திலான கல்வி வாய்ப்புகளை உருவாக்கித் தருவதன் மூலம் நாட்டின் எதிர்கால மனிதவளத்தை மேம்படுத்துவதே இத்திட்டத்தின் பிரதான நோக்கமாகும்.
