மத்திய கிழக்கு பிராந்தியத்தில் ஏற்பட்டுள்ள போர்ச் சூழல் காரணமாக எதிர்காலத்தில் ஏற்படக்கூடிய எரிபொருள் விநியோகச் சிக்கல்களைக் கருத்திற்கொண்டு, எரிபொருளைச் சிக்கனமாகப் பயன்படுத்துவதற்காக அமைச்சரவை இந்தத் தீர்மானத்தை எடுத்துள்ளது.
- புதன்கிழமை விடுமுறை: மறு அறிவித்தல் வரை ஒவ்வொரு வாரமும் புதன்கிழமை அரச அலுவலகங்களுக்கு விடுமுறை தினமாக அறிவிக்கப்பட்டுள்ளது.
- பணிகளை ஈடு செய்தல்: புதன்கிழமைகளில் மேற்கொள்ள வேண்டிய கடமைகளை அந்த வாரத்தின் செவ்வாய்க்கிழமைகளில் பூர்த்தி செய்ய வேண்டும்.
- மேலதிக கொடுப்பனவுகள் இன்மை: ஒரு உத்தியோகத்தரை புதன்கிழமை அன்று சேவைக்கு அழைக்க வேண்டிய அவசியம் ஏற்பட்டால், அதற்காக மேலதிக நேரக் கொடுப்பனவு அல்லது விடுமுறை தினச் சம்பளம் வழங்கப்பட மாட்டாது.
- வார இறுதி நாட்கள்: புதன்கிழமை மூடப்படும் அலுவலகங்களின் உத்தியோகத்தர்களை சனி, ஞாயிறு அல்லது பொது விடுமுறை நாட்களில் மேலதிக நேரக் கொடுப்பனவு அடிப்படையில் சேவைக்கு அழைக்கக் கூடாது.
விதிவிலக்குகள் மற்றும் விசேட அறிவுறுத்தல்கள்
- அத்தியாவசிய சேவைகள்: அத்தியாவசிய சேவைகளை வழங்கும் நிறுவனங்கள் மற்றும் ஏற்கனவே சுழற்சி முறையில் இயங்கும் நிறுவனங்களுக்கு இந்த விடுமுறை பொருந்தாது. அவை சாதாரண வேலை நாட்களாகவே கருதப்படும்.
- தொழில்நுட்ப வசதிகள்: அலுவலகத்திற்கு வராமலேயே தொழில்நுட்ப ரீதியாக பணிகளை முன்னெடுக்க முடியுமெனில், அதற்கான வேலைத்திட்டங்களை நிறுவனத் தலைவர்கள் வகுக்க முடியும்.
- கல்வி மற்றும் நீதித்துறை: பாடசாலைகள் மற்றும் கல்வி நிறுவனங்களுக்கான வழிகாட்டல்கள் கல்வி அமைச்சினாலும், நீதிமன்றங்களுக்கான அறிவுறுத்தல்கள் நீதிச் சேவை ஆணைக்குழுவினாலும் வழங்கப்படும்.
- அனர்த்த முகாமைத்துவம்: ‘டிட்வா’ சூறாவளி அனர்த்தம் தொடர்பான பணிகளுக்காக உத்தியோகத்தர்களை அழைக்கும் அதிகாரம் மாவட்டச் செயலாளர்களுக்கு வழங்கப்பட்டுள்ளது.
ஏனைய கட்டுப்பாடுகள்
- அரச நிறுவனங்களில் விழாக்கள் மற்றும் கருத்தரங்குகளை நடத்துவதை நிறுத்துவதற்கு நடவடிக்கை எடுக்க வேண்டும்.
- மின்சாரம் மற்றும் எரிபொருளைச் சிக்கனமாகப் பயன்படுத்துவது தொடர்பான 04/2022 இலக்கச் சுற்றறிக்கையைத் தொடர்ந்தும் பின்பற்றுமாறு வலியுறுத்தப்பட்டுள்ளது.
