அரச நிறுவனங்களில் எரிபொருள் மற்றும் மின்சாரத்தை சிக்கனமாகப் பயன்படுத்தல்: வழிகாட்டல் வெளியீடு

​மத்திய கிழக்கு பிராந்தியத்தில் நிலவும் போர்ச் சூழல் காரணமாக, எதிர்காலத்தில் எரிபொருள் இறக்குமதியில் ஏற்படக்கூடிய தடைகளைக் கருத்திற்கொண்டு, அரச நிறுவனங்கள் மின்சாரம் மற்றும் எரிபொருளைச் சிக்கனமாகப் பயன்படுத்துவதற்கான விசேட வழிகாட்டல்களை அத்தியாவசிய சேவைகள் ஆணையாளர் நாயகம் வெளியிட்டுள்ளார்.

​அனைத்து அமைச்சின் செயலாளர்கள், மாகாண மற்றும் மாவட்ட செயலாளர்கள் மற்றும் அரச நிறுவனங்களின் தலைவர்களுக்கு நேற்று (23) இந்த ஆலோசனைகள் அனுப்பி வைக்கப்பட்டுள்ளன.

​போக்குவரத்து முகாமைத்துவம்

​எரிபொருள் பாவனையைக் குறைப்பதற்காக அதிகாரிகள் பின்வரும் நடைமுறைகளைப் பின்பற்றுமாறு கேட்டுக்கொள்ளப்பட்டுள்ளனர்:

• ​உத்தியோகத்தர்கள் தனித்தனி வாகனங்களைப் பயன்படுத்துவதைத் தவிர்த்து, பொதுப் போக்குவரத்து அல்லது குழுப் போக்குவரத்து (Staff Transport) சேவைகளைப் பயன்படுத்த வேண்டும்.
• ​களப்பணிகளுக்காகக் குறைந்த எண்ணிக்கையிலான வாகனங்களைப் பயன்படுத்தும் வகையில் முறையான தினசரி போக்குவரத்துத் திட்டங்களை வகுக்க வேண்டும்.

​மின்சாரச் சிக்கன நடவடிக்கைகள்

​மின்சாரப் பயன்பாட்டைக் குறைக்கப் பல முக்கிய கட்டுப்பாடுகள் விதிக்கப்பட்டுள்ளன:

• ​அலுவலகங்களில் முடிந்தவரை இயற்கையான வெளிச்சத்தைப் பயன்படுத்த வேண்டும்.
• ​குளிரூட்டிகளுக்கு (Air Conditioners) பதிலாக மின்விசிறிகளைப் பயன்படுத்த முன்னுரிமை அளிக்க வேண்டும்.
• ​மின்தூக்கிகளின் (Lift) பயன்பாட்டைக் குறைத்து, படிகளைப் பயன்படுத்துவதை ஊக்குவிக்க வேண்டும்.
• ​அதியுயர் பாதுகாப்பு வலயங்களைத் தவிர, ஏனைய வீதிகளில் தற்காலிகமாக மின்விளக்குகளை அணைத்தல் மற்றும் தேவையற்ற நேரங்களில் உள்ளூராட்சி மன்ற மின்விளக்குகளை அணைத்தல்.
• ​பகல் நேரங்களில் அலுவலகங்களில் உள்ள தொலைக்காட்சிப் பெட்டிகளைச் செயலிழக்கச் செய்தல்.

​சேவை வழங்கல் மற்றும் அலுவலக நேரங்கள்

​அரச சேவைகளைத் தடையின்றி முன்னெடுக்கப் புதிய வேலைத்திட்டங்கள் முன்மொழியப்பட்டுள்ளன:

• ​தொழில்நுட்ப வசதிகள் இருக்கும் பட்சத்தில், பணியாளர்களை அலுவலகத்திற்கு அழைக்காமல் இணையவழி (Online) ஊடாகப் பணிகளை முன்னெடுக்க வேண்டும்.
• ​அத்தியாவசியத் தேவைகளைத் தவிர, ஏனைய சந்தர்ப்பங்களில் கடமை நேரத்திற்குப் பின்னரும் வார இறுதி நாட்களிலும் அலுவலகங்களை மூடி வைப்பதை உறுதி செய்ய வேண்டும்.

​பொதுமக்களுக்கு விடுக்கப்பட்டுள்ள வேண்டுகோள்

​இந்தச் சவாலான காலகட்டத்தில் அனைத்து அரச அதிகாரிகளும் பொதுமக்களுக்கு முன்மாதிரியாகச் செயல்பட வேண்டும் என ஆணையாளர் வலியுறுத்தியுள்ளார். இதேவேளை, மாலை 6 மணி முதல் இரவு 10 மணி வரையிலான உச்சப் பயன்பாட்டு நேரங்களில் மின்சாரத்தைச் சிக்கனமாகப் பயன்படுத்துமாறு பிரதி அமைச்சர் சதுரங்க அபேசிங்க பொதுமக்களிடம் கோரிக்கை விடுத்துள்ளார்